Keðjan

Nemendur Kvennaskólans í Reykjavík hafa með sér félag sem nefnist Keðjan og var stofnað í febrúar 1919. Keðjan vinnur að félags-, hagsmuna- og velferðarmálum nemenda. Stjórn Keðjunnar er jafnframt nemendaráð skólans. Nemendaráðið tilnefnir fulltrúa nemenda í skólastjórn og skólanefnd og gerir tillögu til skólaráðs um upphæð nemendasjóðsgjalds.

Ýmsar gamlar hefðir lifa í félagslífi nemenda svo sem eplaball og peysufatadagur. Tjarnardagar og dimission eru meðal þess sem nýrra er. Söngvakeppnin Rymja er árlegur viðburður. Skólinn sendir einnig lið í keppnirnar Gettu betur og Morfís og gefið er út skólablað. Nemendafélagið Keðjan starfar á ábyrgð Kvennaskólans og bókhald félagsins er háð sömu reglum og endurskoðun og bókhald skólans. Keðjan heldur úti veglegri heimasíðu. Slóðin er: www.kedjan.is.