Foreldrasamstarf

Kvennaskólinn leitast við að hafa gott samstarf við foreldra nemenda, sérstaklega á þetta við um ólögráða nemendur. Haldinn er kynningarfundur með foreldrum nýnema snemma á haustönn þar sem starf og aðstaða í skólanum er kynnt, námsráðgjafar kynna þjónustu sína og umsjónarkennarar funda með foreldrum umsjónarnemenda sinna.

Foreldrum ólögráða nemenda er gert aðvart ef í óefni stefnir varðandi skólasókn og námsárangur. Þeir fá t.d. sent heim afrit af áminningu varðandi slaka skólasókn.

Umsjónarkennarar eru tengiliðir skólans og foreldra og hafa bæði þeir og aðrir kennarar vikulega viðtalstíma sem foreldrar eru hvattir til að notfæra sér. Þegar nemandi hefur náð sjálfræðisaldri er einungis heimilt að veita honum sjálfum, eða þeim sem nemandinn hefur gefið til þess skriflegt umboð, upplýsingar um nemandann úr gagnasafni skólans.