Lið Kvennaskólans varð í 2. sæti í Boxinu

Keppt var til úrslita í Boxinu - framkvæmdakeppni framhaldsskólanna á laugardaginn 12. nóvember í HR.  Lið Kvennaskólans, Óskar Harrison Pilkington liðsstjóri, Eva Kolbrún Kolbeins, Jarþrúður Ósk Jóhannsdóttir, Jón Kaldalóns Björnsson og Guðrún Hérdís Arnardóttir öll úr 3NA, varð í 2. sæti eftir harða og spennandi keppni. Lið MH varð í fyrsta sæti og lið MR í því þriðja. Alls kepptu átta lið í úrslitakeppninni. 

Boxið felst í því að leysa fjölbreyttar þrautir sem reyna á hugvit og verklag. Liðin fóru í gegnum þrautabraut með átta þrautum sem voru hannaðar af sérfræðingum fyrirtækja úr  ólíkum greinum iðnaðarins, með aðstoð fræðimanna HR. Fyrirtækin sem lögðu þrautir fyrir nemendur í ár voru: CCP, ÍAV, Marel, Matís, ORF, Líftækni, Orkuvirki, Trefjar og Verkís.

Meðal þrauta sem liðin glímdu við var að verja egg fyrir falli úr þriggja metra hæð, byggja líkan af námuskipi úr tölvuleiknum EVE Online, smíða líkan af þrívíddarbyggingu próteins og koma með hugmynd að matvöru.

Lið Kvennaskólans hlaut verðlaun fyrir  verkfræðilegustu lausnina frá Verkís. Orkuvirki veitti þeim verðlaun fyrir bestu úrlausnina hjá þeim. 

Þetta var frábær árangur hjá liðinu og óskum við þeim innilega til hamingju með árangurinn.

Frekari umfjöllun um keppnina má sjá hér.

Myndir