Parísarferð

Hópur Kvennskælingja fór til Parísar á dögunum. Ferðin er hluti af svokölluðum Parísaráfanga sem er í boði fyrir frönskunemendur hér við skólann. Í áfanganum fræðast nemendur um heimsborgina París og vinna ýmis verkefni. Menningarferð til Parísar er hápunktur áfangans og að þessu sinni dvöldu 23 nemendur í Parísarborg frá 6. til 10. október ásamt frönskukennurum skólans, Jóhönnu Björk Guðjónsdóttur og Margréti Helgu Hjartardóttur.

Hópurinn skoðaði saman helstu kennileiti borgarinnar, t.d. Eiffelturninn, Sigurbogann, Louvre safnið, Notre-Dame dómkirkjuna og Montmartre hæðina. Einnig fór hópurinn í langan og fróðlegan göngutúr um Mýrina (le Marais) og latínuhverfið undir leiðsögn Kristínar Jónsdóttur Parísardömu og í siglingu á ánni Signu þar sem sagt var frá ýmsu sem fyrir augu bar. Hluti af dagskrá hópsins fólst í því að nemendur fóru saman í smærri hópum í ólíkar áttir og skoðaði nokkra fyrirfram ákveðan staði. Þar áttu þeir að kynna sér staðhætti og viða að sér efni, taka myndir og myndbönd. Þeir þurftu líka að taka viðtöl á frönsku við fólk sem þeir hittu á stöðunum svo töluvert reyndi á frönskukunnáttu þeirra. Þetta gekk allt vel og frá heimkomu hafa þeir unnið úr því sem þeir sáu og gerðu og eru í þann mund að fara að flytja fyrirlestra í kennslustund um viðfangsefni sín. 

Ferðin gekk mjög vel og Parísarborg skartaði sínu fegursta í góðu veðri, að mestu sól og blíðu. Óhætt er að segja að ferðin hafi verið mjög lærdómsrík, þroskandi og spennandi og að nemendur hafi verið áhugasamir og skólanum til mikils sóma. 

Myndir úr ferðinni má sjá hér