Í tilefni af degi íslenskrar tungu 16. nóvember er ljóð vikunnar Móðir mín eftir Einar Bendiktsson.

Einar Benediktsson (1864-1940) var fæddur að Elliðavatni, en ólst upp að Héðinshöfða á Tjörnesi frá 9 ára aldri. Hann var sonur Benedikts Sveinssonar sýslumanns og alþingismanns. Varð stúdent frá Lærða skólanum 1884 og lögfræðingur frá Hafnarháskóla 1892. Einar stofnaði fyrsta dagblaðið á Íslandi, Dagskrá 1896. Hann var sýslumaður Rangæinga 1904-1906. Gerðist þá umsvifamikill fésýslumaður. Hann var mikill áhugamaður um virkjun fallvatna og stofnaði ásamt öðrum Fossafélagið Títan 1914. Frá 1907-21 bjó hann langdvölum erlendis og einnig síðar til 1932. Síðustu átta ár ævi sinnar bjó Einar í Herdísarvík á Reykjanesi og lést þar. Einar var grafinn í þjóðargrafreitnum á Þingvöllum.

Móðir mín

Móðir. Ég sigli minn sjó fram á haust.
Til suðurs hver fold er í kafi. —
En Sóley rís úti, sveipuð laust
í svellgljá og kvöldroða- trafi.
Hér á að draga nökkvann í naust.
Nú er ég kominn af hafi.

Í borga og stranda streymandi sveim
mín stjarna leit til þín í vestur; —
því hvar er svo fátt sem í hópsins geim,
eða hljótt, sem þar glaumur er mestur?
Og venur það ekki viljann heim
að vera hjá sjálfum sér gestur?

Í förum, við öldu og áttar kast,
margt orð þitt mér leið í minni.
— Draumarnir komu. Ég lék og þú last
í lítilli stofu inni.
Hvort logn var á sæ eða bára brast,
þú bjóst mér í hug og sinni.

Við spor hvert um Bifröst, að Heljar hyl,
til himins vor tunga bjó vörðu.
Þú last — þetta mál með unað og yl
yngdan af stofnunum hörðu.
— Ég skildi, að orð er á Íslandi til
um allt sem er hugsað á jörðu.

Einar Benediktsson
(Ljóðmæli, III bindi, 1945)