Ljóðskáld vikunnar er Þorsteinn frá Hamri (1938-)

Þorsteinn er meðal fremstu ljóðskálda sem yrkja á íslenska tungu. Eftir hann hafa komið út fjöldi ljóðabóka, skáldsögur, sagnaþættir og þýðingar.
Hann hefur hlotið margvíslegar viðurkenningar fyrir skáldskap sinn, þar á meðal verðlaun á degi íslenskrar tungu árið 2009.

  
Sauðamenn
Þeir hverfa á föstunni.
Hvert þeir fara veit enginn.


Sumir
sjást ekki framar.


Öðrum skilar
hefðin með nauðung heim


þangað sem gaddurinn
frystir fúlt loftið,
óbreytt, kyrrt
til eilífðarnóns;


og virðast aldrei
samir síðan ...


Höfðu þeir setið
seiðveizlu, álfajól?


eða stormarnir gárað
geðið og blóðið
í fjarlægri, framandi byggð


þar sem viðrað er út
úr dalskorum, hugum og húsum?

Þorsteinn frá Hamri
                                                                                                                                                                                                                                                                                                                              (Allt kom það nær, 2011)