Kvennaskólinn útskrifar 145 stúdenta

Föstudaginn 27. maí voru 145 stúdentar útskrifaðir frá Kvennaskólanum við hátíðlega athöfn í Hallgrímskirkju. Kór Kvennaskólans söng og útskriftarnemendurnir Stefanía Ósk Margeirsdóttir og Ríkey Guðmundsdóttir glöddu gesti með tónlistaratriðum. Sindri Már Hjartarson, fráfarandi formaður nemendafélagsins Keðjunnar, flutti ávarp fyrir hönd nýstúdenta.
        Fjölmargir nemendur hlutu verðlaun fyrir góðan námsárangur í ýmsum greinum ásamt því sem nokkrir nemendur hlutu viðurkenningu fyrir framlag sitt til félagsmála nemenda. Dúx skólans á stúdentsprófi varð Olga Sigurðardóttir 4NÞ með meðaleinkunnina 9,79 sem jafnframt er hæsta stúdentspróf sem tekið hefur verið við Kvennaskólann. Hlaut hún verðlaun úr Minningarsjóði frú Þóru Melsteð, stofnanda Kvennaskólans í Reykjavík.  Fjórir aðrir nemendur hlutu einnig ágætiseinkunn á stúdentsprófi. Þetta eru þau Hulda Þorsteinsdóttir 4NÞ, Helgi Guðmundur Ásmundsson 4NL, Hlynur Helgason 4NL og Valdís Valgeirsdóttir 4NÞ. Stúdentspennann 2011, verðlaun fyrir bestu stúdentsritgerðina, úr Verðlaunasjóði dr. Guðrúnar P. Helgadóttur, hlaut Áslaug Sif Guðjónsdóttir 4FUS.
        Nokkrir fulltrúar afmælisárganga skólans voru viðstaddir. Fyrir hönd 25 ára afmælisárgangsins talaði Tómas Hansson og færðu þau skólanum málverk, „Valmúar í íslensku vori“ eftir Pétur Gaut, að gjöf.
        Eftir skólaslitin var öllum boðið til móttöku í húsnæði skólans að Fríkirkjuvegi 9.

 

Olga Sigurðardóttir er dúx skólans 2011 með meðaleinkunnina 9,79.

Sindri Már, fráfarandi formaður nemendafélagsins Keðjunnar, flutti ávarp fyrir hönd nýstúdenta.

Kór skólans flutti nokkur lög.