Námsmat og einkunnagjöf

Námsmat felst í því að leggja mat á þekkingu, leikni og hæfni nemenda. Í skólanum er lögð áhersla á fjölbreytt námsmat og leitast er við að beita ólíkum námsmatsaðferðum sem geta m.a. falið í sér verkefni, ritgerðir, próf (skrifleg-, munnleg- og hlustunarpróf), skýrslur, kynningar, tilraunir, lokapróf, þátttöku nemenda í kennslustundum o.fl.

Fyrirkomulag námsmats í hverjum áfanga og vægi einstakra þátta í námsmati kemur fram í námsáætlun. Nemendum er sérstaklega bent á að í sumum áföngum verða þeir að standast lokapróf áður en símatseinkunn er reiknuð inn. Þetta kemur þá fram í námsáætlun.

Allt skipulag og framkvæmd námsmats er í höndum kennara og allar upplýsingar um námsmat í áföngum eru aðgengilegar í Innu.

Lokaeinkunnir í áföngum eru gefnar í heilum tölum frá 1 – 10 og eftirfarandi er haft til hliðsjónar um merkingu þeirra:

• Einkunnin 10 merkir að 95-% markmiða er náð
• Einkunnin 9 merkir að 85-94% markmiða er náð
• Einkunnin 8 merkir að 75-84% markmiða er náð
• Einkunnin 7 merkir að 65-74% markmiða er náð
• Einkunnin 6 merkir að 55-64% markmiða er náð
• Einkunnin 5 merkir að 45-54% markmiða er náð
• Einkunnin 4 merkir að 35-44% markmiða er náð
• Einkunnin 3 merkir að 25-34% markmiða er náð
• Einkunnin 2 merkir að 14-24% markmiða er náð
• Einkunnin 1 merkir að 0-14% markmiða var náð

Nemandi telst hafa staðið áfanga fái hann 5 eða hærra í lokaeinkunn.

Í einstaka áfanga eru gefnar einkunnirnar:

• Einkunnin S (staðið) merkir að 45-100% markmiða er náð
• Einkunnin F (fall) merkir að 0-44% markmiða er náð
• Einkunnin M (metið) merkir að námið er metið t.d. úr stöðuprófum, námskeiðum og þess háttar.

Frávik frá einkunnareglum: Nemendur á félags- og náttúruvísindabraut geta lokið tveimur áföngum á námsferlinum með lokaeinkunninni 4 án þess að missa einingarnar. Þetta frávik er aðeins heimilt í lokaáfanga greinar.

Einkunnir eru birtar nemendum í lok hverrar annar í Innu. Í lok hverrar annar er haldin námsmatssýning þar sem nemendur geta skoðað þau gögn sem námsmat byggir á.

Nemendur eiga rétt á að fá útskýringar á mati sem liggur að baki lokaeinkunn í námsáfanga innan fimm virkra daga frá birtingu einkunna í Innu. Vilji nemendur, sem ekki hafa náð lágmarkseinkunn, þá eigi una mati kennarans geta þeir snúið sér til skólameistara og óskað eftir mati sérstaks prófdómara. Slík beiðni þarf að vera skrifleg og í henni þarf að koma fram rökstuðningur fyrir beiðninni. Þá skal kveða til óvilhallan prófdómara sem metur prófúrlausnir. Úrskurður prófdómara er endanlegur og verður ekki skotið til æðra dómsvalds.