ENSK3FA05 - Fagorðaforði

Námskeiðið er framhaldsáfangi í fagorðaforða (academic vocabulary) til undirbúnings fyrir háskólanám. Unnið er með ritrýndar fræðigreinar á tilteknum fræðasviðum svo sem náttúruvísindum, félagsvísindum og hugvísindum. Farið er í orðstofna og myndun orða í ensku út frá t.d. latínu og grísku. Leitað er fanga í fagtímaritum og ritrýndum faggreinum af netmiðlum og gagnasöfnum. Nemendur fá tilsögn í heimildaleit fyrir rannsóknarvinnu á háskólastigi. Miðað verður við þarfir hópsins hverju sinni þar sem farið er nánar í orðaforða sem tengist væntanlegu námssviði nemenda við nám eftir stúdentspróf. Áfanginn skiptist í þrjár lotur. Í fyrstu lotunni er viðfangsefnið almennt, þar sem megináherslan er á myndun og notkun fagorða. Í annarri og þriðju lotu vinna nemendur einstaklingsverkefni þar sem skoðaður er orðaforði afmarkaðra sviða og greina á háskólastigi, s.s. hugvísinda, félagsvísinda, raunvísinda o.s.frv. Miðað er við að þessi einstaklingsverkefni séu í því fagi sem nemendur hafi hugsað sér að leggja stund á eftir stúdentspróf. Kröfur áfangans samsvara hæfnisþrepi C1 í Evrópska tungumálarammanum (CEFRL).