Lýðheilsu- og forvarnarstefna

Tilgangur lýðheilsu- og forvarnarstefnu Kvennaskólans í Reykjavík er að stuðla að heilbrigðum lífsháttum, jákvæðri lífssýn nemenda og vinna gegn hvers kyns áhættuhegðun. Lögð er áhersla á að styrkja félagslíf sem eflir félagsþroska nemenda og minnkar líkur á neyslu vímuefna.

Markmið stefnunnar eru að:

• efla vitund nemenda um gildi heilbrigðra lífshátta
• auka meðvitund nemenda um hvar ábyrgð þeirra liggur á eigin heilsu og vellíðan
• vekja nemendur til umhugsunar um styrkleika sína og veikleika og styrkja með því sjálfsmynd þeirra, sjálfstraust, félagsþroska og félagstengsl
• stuðla að góðum skólabrag
• seinka eftir megni eða koma í veg fyrir að nemendur hefji neyslu á áfengi, tóbaki eða öðrum vímuefnum

Forvarnarfulltrúi og tengiliður skólans við verkefnið Heilsueflandi framhaldsskóli er Ester Bergsteinsdóttir, sálfræðikennari. Netfang esterb[hjá]kvenno.is.

Aðgerðir sem styðja við markmið stefnunnar:

• Þátttaka Kvennaskólans í verkefninu Heilsueflandi framhaldsskóli. Samræmdir matslistar eru notaðir til að meta stöðu skólans og finna hvar hægt er að gera betur. Nánari upplýsingar um verkefnið má finna hér.
• Fræðsla um heilbrigða lífshætti, forvarnir, geð- og kynheilbrigði.
• Stuðningur og aðhald við nemendur í gegnum stoðþjónustu skólans og umsjónarkennara. Ferli fylgt ef áhyggjur vakna af stöðu og/eða líðan nemanda.
• Fræðsla til nemenda um hvert og til hverra þeir geti leitað stuðnings og aðstoðar innan skólans og utan.
• Fræðsla til nemenda um einkenni og skaðsemi fíknar og áhrif hugbreytandi efna.
• Áhersla á góð samskipti og forvarnir gegn einelti innan skólans.
• Fræðsla um hvernig fyrirbyggja megi líkamlegt, andlegt, félagslegt og kynferðislegt ofbeldi (EKKO mál).
• Tilkynningahnappur er á heimasíðu skólans sem nemendur geta notað til að tilkynna um EKKO-mál. Í skólanum er EKKO-teymi sem annast þau mál sem koma upp (Stefnu og viðbragðsáætlun gegn einelti og ofbeldi (EKKO) Kvennaskólans má sjá hér).
• Samstarf við aðra skóla, Landlæknisembættið og fleiri aðila sem vinna að forvörnum.

Hlutverk forvarnarfulltrúa:

• samhæfa forvarnarfræðslu fyrir nemendur
• vera talsmaður forvarnastefnunnar og fylgja henni eftir í samráði við stjórnendur
• stjórna og leiða saman forvarnateymi skólans og leita þar ráðgjafar og taka á málum líðandi stundar
• sinna gæslu á böllum á vegum Keðjunnar (nemendafélagsins) og þeim ferðum sem farnar eru undir eftirliti skólans
• samráð við félagsmálafulltrúa og nemendafélag skólans, þar sem unnið er eftir forvarnastefnu skólans
• sinna fræðslu um forvarnir fyrir forráðamenn
• fá foreldra til liðs við gæslu á böllum á vegum nemendafélagsins
• vera tengiliður við foreldrafélagið og veita ráðgjöf um fræðslu
• tryggja starfsemi edrúpotts og gera hann eftirsóknaverðan
• að sækja sér fræðslu og uppfæra þekkingu sína á heilsu og líðan ungmenna á Íslandi

Forvarnarteymi skólans

Forvarnarteymi er starfrækt við skólann og stýrir forvarnarfulltrúi teyminu.
Forvarnarteymið samanstendur af skólameistara, aðstoðarskólameistara, forvarnar- og félagsmálafulltrúa og fulltrúa stoðþjónustu.

Skólareglur er varða lýðheilsu- og forvarnarstefnu

• Gagnkvæm virðing, kurteisi, heiðarleiki og ábyrgð skulu ríkja í samskiptum nemenda og starfsfólks.
• Nemendur eiga rétt á að þeim sé sýnd kurteisi, tillitsemi og virðing og að þeir séu ekki beittir einelti, kynferðislegri áreitni, kynbundinni áreitni eða ofbeldi af samnemendum eða starfsfólki skóla.
• Kvennaskólinn er tóbakslaus skóli. Allar tegundir tóbaksnotkunar eru bannaðar í húsakynnum skólans, lóð, samkomum og í ferðalögum á vegum skólans. Sama gildir um notkun rafrettna.
• Í skólanum, á lóð skólans, á samkomum og/eða í ferðalögum á vegum skólans skal enginn hafa áfengi eða önnur hugbreytandi efni um hönd né vera undir áhrifum þeirra.
• Fjallað er um viðurlög við brotum á framangreindu í skólareglum skólans.

(Síðast uppfært í mars 2025)